UKAWA WAELEZA UTARATIBU WA KUPATA WAGOMBEA WAO.... WASAINI MUONGOZO WA USHIRIKIANO BILA NLD

Umoja wa Katiba ya Wananchi (Ukawa), umesaini muongozo wa ushirikiano katika uchaguzi wa serikali za mitaa, vijiji na vitongoji; makubaliano ambayo yatatumika kwenye uchaguzi huo uliopangwa kufanyika mwezi ujao.

Muongozo huo ulisainiwa jana jijini Dar es Salaam na viongozi wa vyama vinavyounda umoja huo ambao ni Profesa Ibrahim Lipumba (CUF), Dk. Wilbrod Slaa (Chadema) na James Mbatia (NCCR-Mageuzi) wakati Emmanuel Makaidi wa NLD alishindwa kusaini kwa kuwa alipata udhuru.

Profesa Lipumba alisema miongoni mwa mambo ya msingi ni kusimamisha mgombea anayekubalika zaidi katika kijiji, kitongoji au mitaa; kuangalia chama kinachofanya vizuri katika eneo husika kwenye uchaguzi uliopita na idadi ya wanachama.

“Kila chama kilicho kwenye ushirika kinapaswa kuandaa wagombea (Mwenyekiti na wajumbe) wenye sifa na wanaokubalika katika jamii isipokuwa ni marufuku kwa chama kushawishi mwanachama wa chama kilichopo kwenye ushirika wa Ukawa kuhamia chama kingine,” inaeleza sehemu ya makub aliano hayo.

“Vyama vya ushirikiano vitatumia utaratibu wa mashauriano/muafaka katika kumpata mgombea wa mtaa/kijiji/kitongoji kwa kuwashindanisha wagombea kutokana na sifa na kukubalika kwao.”

Aidha, makubaliano hayo yanaeleza pia kuwa sehemu ambayo serikali ya kijiji, kitongoji au mtaa inayomaliza muda wake inaongozwa na mojawapo ya vyama vilivyopo kwenye ushirikiano inaweza kuwa kigezo cha kuachiwa kuendelea kutetea kiti hicho kama bado chama husika kinakubalika.

Makubaliano hayo pia yanaeleza kuwa iwapo vyama vikishindwa kupata maridhiano ya uteuzi, wanachama katika eneo husika watapigakura ya kumpitisha mgombea mmoja miongoni mwa wale waliosimamishwa na chama. “Ngazi ya Wilaya ya vyama shirika itakuwa msimamizi wa zoezi hilo,” yanaeleza makubaliano hayo.

Makubaliano mengine ni kuvitaka vyama hivyo kushirikiana kumnadi mgombea atakayepitishwa na kwamba baada ya uchaguzi, viongozi wa kitaifa wataandaa kanuni ya pamoja itakayosimamia nidhamu kwa viongozi wote wa serikali watakaokuwa wamechaguliwa.